គ្រាប់យុទ្ធភណ្ឌមិនទាន់ផ្ទុះសល់ពីសម័យសង្គ្រាម បានឆក់យកជីវិតបុរសម្នាក់ ខណៈពេលកំពុងបើកត្រាក់ទ័រភ្ជួរដី!

(ព្រះវិហារ)៖ បុរសម្នាក់បានស្លាប់ ចំណែកត្រាក់ទ័ររងការខូចខាតទាំងស្រុង ខណៈពេលកំពុងបើកភ្ជួរដី ជាន់គ្រាប់មីនតោន ផ្ទុះផ្អើលប្រជាពលរដ្ឋ ។

ហេតុការណ៍នេះបានកើតឡើង កាលពីវេលាម៉ោង២ និង៣០នាទី ថ្ងៃទី២២ ខែឧសភា ឆ្នាំ២០២២ ត្រង់ចំណុចខាងលិចភូមិស្ទឹងខៀវតេជោ ឃុំស្រអែម ស្រុកជាំក្សាន្ត ខេត្តព្រះវិហារ។

នេះបើយោងតាមប្រភពដែលទទួលបាន ពីលោកលិញ យុត អភិបាលរងស្រុកជាំក្សាន្ត បានឲ្យដឹងថា នៅមុនពេលកើតហេតុ ជនរងគ្រោះបានអង្គុយបើកត្រាក់ទ័រភ្ជួរដីស៊ីឈ្នួលគេ នៅក្នុងភូមិសាស្ត្រកើតហេតុខាងលើ។ ខណៈពេលកំពុងភ្ជួរៗ ក៏បានប៉ះចំលើគ្រាប់មីនតោន ផ្ទុះបណ្តាលឲ្យស្លាប់នៅនឹងកន្លែង។

ចំណែកត្រាក់ទ័របានរងនូវការខូចខាតទាំងស្រុង ។

ជនរងគ្រោះមានឈ្មោះ រី លីន ភេទប្រុស អាយុ២៩ឆ្នាំ រស់នៅភូមិអន្លង់វែង ឃុំកន្ទួត ស្រុកជាំក្សាន្ត ខេត្តព្រះវិហារ។ បច្ចុប្បន្នសពត្រូវបានឳពុកម្តាយយកទៅធ្វើបុណ្យនៅផ្ទះតាមប្រពៃណី៕

Leave a Reply

Your email address will not be published.