សហរដ្ឋអាមេរិក និងកូរ៉េខាងត្បូង បានធ្វើសមយុទ្ធជាលើកទីពីរ ក្នុងមួយសប្តាហ៍ពីកាលពីថ្ងៃសុក្រ ។
ជាមួយនឹងយន្តហោះចម្បាំងចុងក្រោយបង្អស់របស់ប្រទេសទាំង២ ទោះបីជា មានការថ្កោលទោសយ៉ាងខ្លាំង ពីកូរ៉េខាងជើងក៏ដោយ។
យោធាកូរ៉េខាងត្បូងៈ បានបង្ហាញនៅក្នុងសេចក្តីថ្លែងការណ៍មួយថា សម្ព័ន្ធមិត្តទាំងពីរ បានធ្វើសមយុទ្ធផ្លូវអាកាសរួមគ្នា លើសមុទ្រនៅភាគខាងលិច នៃឧបទ្វីបកូរ៉េ កាលពីថ្ងៃសុក្រ ដោយមានយន្តហោះចម្បាំងដូចជា យន្តហោះ F-35A របស់កូរ៉េខាងត្បូង និង F-22 និង F-35B របស់សហរដ្ឋអាម៉េរិក ចូលរួម។
បន្ថែមពីនោះ សេចក្តីថ្លែងការណ៍បានបញ្ជាក់ថាៈ កងកម្លាំងទ័ពអាកាសនៃប្រទេសទាំងពីរ នឹងបន្តពង្រឹងសមយុទ្ធរួមគ្នា ។
ដើម្បីមានសមត្ថភាពឆ្លើយតបខ្លាំង និងការត្រៀមខ្លួនប្រឆាំងនឹងការគំរាមកំហែងនុយក្លេអ៊ែរ និងមីស៊ីលរបស់កូរ៉េខាងជើង។
កាលពីឆ្នាំមុន កូរ៉េខាងជើង បានសាកល្បងមីស៊ីលផ្លោង ក្នុងចំនួនដ៏ច្រើនបំផុតមិនធ្លាប់មាន ដែលត្រូវបានហាមប្រាម ដោយសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។
ទីក្រុងព្យុងយ៉ាង ក៏បានបើកទីតាំងសាកល្បងអាវុធនុយក្លេអ៊ែរ ឡើងវិញ ដោយបង្កើនការរំពឹងទុក នៃការធ្វើតេស្តនុយក្លេអ៊ែរ ជាលើកដំបូងចាប់តាំងពីឆ្នាំ ២០១៧។
គួររំលឹកថាៈ កាលពីថ្ងៃព្រហស្បតិ៍ ក្រសួងការបរទេសកូរ៉េខាងជើង បានលើកឡើងថាៈ សមយុទ្ធដោយសហរដ្ឋអាមេរិក និងសម្ព័ន្ធមិត្តបានឈានដល់ បន្ទាត់ក្រហមខ្លាំងហើយ ។
ដោយបានគម្រាមបង្វែរឧបទ្វីបទៅជាឃ្លាំងអាវុធសង្គ្រាមដ៏ធំ និងជាតំបន់សង្គ្រាមដ៏គ្រោះថ្នាក់៕