(បន្ទាយមានជ័យ)៖ ពលរដ្ឋ ពុទ្ធបរិស័ទ ចំណុះជើង”វត្តចារថ្មី”ស្ថិតភូមិចារថ្មី ឃុំគោកបល្ល័ង្ក ស្រុកមង្គលបុរី ខេត្តបន្ទាយមានជ័យ ប្រមាណជិត១០០នាក់ នៅព្រឹកថ្ងៃទី២៤.០១.២០២៣។
បានប្រមូលផ្ដុំគ្នាផ្ទុះការតវ៉ា ក្នុងវត្ត មិនឱ្យអាជ្ញាធរ បណ្ដេញ ព្រះគ្រូចៅអធិការ”វត្តចារថ្មី”ចេញពីវត្តជាដាច់ខាត!។
ក្នុងនោះពលរដ្ឋអះអាងថាៈ ពួកគាត់បានផ្តិតមេដៃ គាំទ្រព្រះគ្រូចៅអធិការវត្តចារថ្មី ដោយមិនអោយអាជ្ញាធរ ឬមន្ត្រីសង្ឃ បណ្ដេញ ព្រះគ្រូចៅអធិការវត្តចារថ្មី ចេញពីវត្តនោះឡើយ។
ដោយផ្អែកថាៈ ចៅអធិការវត្តអង្គនេះ ជាសង្ឃល្អ ចេះជួយកសាងវត្ត ម្យ៉ាងទៀត ព្រះអង្គគ្មានញាតិ ញោម សាច់ញាតិ នៅទីនេះផង មើលទៅគួរឱ្យអាណិត!។
ពលរដ្ឋបញ្ជាក់ថាៈ ករណីអធិករណ៍ ក្នុងវត្តនេះ បង្កចេញពីអាជ្ញាធរដែលខឹងគោវ៉ៃរទេះ ។
ព្រោះតែរឿងទារ លុយយកមកប្រគេនព្រះចៅអធិការកសាងវត្ត ក៏ប្តឹងរំសាយព្រះចៅអធិការដូចជារឿងអយុត្តិធម៌ពេកហើយ ។
សួរថាៈ ព្រះគ្រូចៅអធិការវត្តចារថ្មី ខុសអ្វី តើទំនាស់អធិករណ៍ ចេញពីអ្នកណា? ។
សុំជួយរកយុត្តិធម៌ ប្រគេនព្រះគ្រូចៅអធិការវត្តផង ព្រោះវាដូចជាអយុត្តិធម៌ពេកហើយ ទើបពួកគាត់នៅការពារមិនអោយរំសាយឬបណ្ដេញចៅអធិការវត្ត។
អាជ្ញាធរឃុំគោកបល័្លង្ក បានថ្លែងថាៈ មូលហេតុដែលមន្ត្រីសង្ឃ រំសាយព្រះសង្ឃនិងគណៈកម្មការ អាចារ្យវត្ត ចេញ ក៏ព្រោះតែកើតមានរឿងអធិករណ៍ក្នុងវត្ត។
រីឯលោក រ័ត្ន ដាស៊ីណង់ អភិបាលស្រុកមង្គលបុរី បានលើកឡើងថាៈ រឿងរ៉ាវអធិករណ៍ជម្លោះក្នុងវត្តចារថ្មី ឃុំគោកបល័្លង្ក ដែលមានប្រជាពលរដ្ឋធ្វើការតវ៉ាជំទាស់មិនអោយរំសាយព្រះសង្ឃក្នុងវត្តនោះ!។
គឺមន្ទីរធម្មការ និងសាសនាខេត្តបន្ទាយមានជ័យ និងមន្ត្រីសង្ឃ និងព្រះមេគណខេត្ត បានសម្រេចហើយនិងបានជូនដំណឹងទៅព្រះគ្រូចៅអធិការវត្តចារថ្មី ។
ឱ្យរៀបចំអីវ៉ាន់ចេញពីវត្ត ដោយអង្គឯងបើសិនជាមិនរំសាយទេ អាចនឹងប្រជុំគណៈកម្មការ ដើម្បីបណ្តេញព្រះសង្ឃចេញពីវត្តតែម្ដង ។
បើតាមលោក រ័ត្ន ដាស៊ីណង់ មូលហេតុដែល ឱ្យចៅអធិការ រើចេញពីវត្ត ព្រោះមានទំនាស់ក្នុងវត្ត ធ្វើឱ្យប៉ះពាល់ដល់សាសនា មិនអាចទុកបានឡើយ៕
