(ភ្នំពេញ)៖ ក្រសួងសុខាភិបាល សម្រេចឱ្យ”មន្ទីរសម្រាកព្យាបាល និងសម្ភព ដើមអង្គ្រង”(ផ្សារព្រៃទទឹង)។
ទទួលខុសត្រូវចំពោះមុខច្បាប់ ករណីធ្វេសប្រហែស រំលូតគភ៌ស្លាប់ក្នុងផ្ទៃអាយុ១៨សប្តាហ៍ បណ្ដាលឱ្យស្ដ្រីម្នាក់វិវត្តន៍ទៅជាធ្ងន់ធ្ងរ និងកំពុងជួយសង្គ្រោះនៅមន្ទីរពេទ្យកាល់ម៉ែត្រ។
នេះបើយោងតាមសេចក្ដីប្រកាសព័ត៌មាន របស់ក្រសួងសុខាភិបាល ចុះការបរិច្ឆេទ នៅថ្ងៃទី៣០.១១.២០២២។
សូមជម្រាបថាៈ មន្ទីរសម្រាកព្យាបាលដើមអង្គ្រង (ព្រៃទទឹង) ស្ថិតនៅក្នុងភូមិលៀក ឃុំព្រះនិពាន្ធ ស្រុកកងពិសី ខេត្តកំពង់ស្ពី។
នៅក្នុងសេចក្ដីប្រកាសព័ត៌មាន ក្រសួងបានពិនិត្យឃើញថាៈ មន្ទីរសម្រាកព្យាបាលដើមអង្គ្រង(ព្រៃទទឹង) មានការធ្វេសប្រហែស។
ដោយអោយ ឆ្មប ដែលមិនមានជំនាញច្បាស់លាស់ មករំលូតគភ៌ស្លាប់ក្នុងផ្ទៃអាយុ១៨សប្តាហ៍ ជាហេតុនាំឱ្យស្ដ្រីម្នាក់វិវត្តន៍ទៅជាធ្ងន់ធ្ងរ និងកំពុងជួយសង្គ្រោះ។
ក្រោយរកឃើញពីការធ្វេសប្រហែសបែបនេះ ក្រសួងសុខាភិបាល បាន
សម្រេចៈ បិទគ្លីនិកដើមអង្គ្រង។
សម្រេចឱ្យ គ្លីនិកដើមអង្គ្រងទទួលខុសត្រូវចំពើមុខច្បាប់។
សម្រេច ផ្អាកការងារឆ្មប ឈ្មោះ អ៊ុង ធារិន រយៈពេល២ឆ្នាំ។
ក្នុងនោះក្រសួងបានសម្ដែងការសោកស្ដាយជាខ្លាំងចំពោះករណីនេះ។
ស្ដ្រីរងគ្រោះឈ្មោះ សឿន ស្រីអូន អាយុ២២ឆ្នាំ បច្ចុប្បន្នៈភូមិអន្លង់រមៀត ឃុំអន្លង់រមៀត ស្រុកកណ្ដាលស្ទឹង ខេត្តកណ្ដាល។
អ្នកជំងឺរូបនេះ បានចូលមកសម្រាកនៅគ្លីនិកដើមអង្គ្រង កាលពីថ្ងៃទី១០ ខែវិច្ឆិកា ឆ្នាំ២០២២ ដោយរោគវិនិច្ឆ័យ កូនស្លាប់ក្នុងស្បូនអាយុ១៨ សប្តាហ៍។
ពោលគឺៈ ក្រុមគ្រូពេទ្យនៅគ្លីនិកមួយនេះ បានធ្វើការព្យាបាលដោយ រំលូតយកកូនដែលស្លាប់ក្នុងផ្ទៃចេញ និងបន្តសម្រាកនៅគ្លីនិក រយៈពេល១ យប់ ហើយបានចេញពីគ្លីនិកដើមអង្គ្រងនៅថ្ងៃទី ១១ ខែ វិច្ឆិកា។
នៅថ្ងៃទី២២ ខែវិច្ឆិកា ស្ត្រីអ្នកជំងឺបានមកគ្លីនិកដដែលម្ដងទៀត ដោយរោគសញ្ញាឈឺពោះខ្លាំង នៅផ្នែកខាងក្រោម គ្រូពេទ្យក៏បានធ្វើការសម្អាតស្បូនឡើងវិញ។
បើតាមហ្វេសប៊ុក ដែលក្រុមគ្រួសាររងគ្រោះបង្ហោះបានលើកឡើងថាៈ ស្ដ្រីរងគ្រោះមានផ្ទៃពោះ៥ខែ ស្លាប់កូនក្នុងផ្ទៃ ឲ្យមន្ទីរសម្រាក និងសម្ភពដើមអង្គ្រង(ផ្សារព្រៃទទឹង)យកចេញ ធានាមួយស្អាតអស់ ៤០០ដុល្លារ បែរជាកាត់ដាច់ពោះវៀននាងជាច្រើនកង់យកចេញមកក្រៅ បណ្ដាលឱ្យនាងធ្វើទុក្ខវិវត្តន៍ទៅជាធ្ងន់ធ្ងរ៕
